విద్యార్థుల్లో క్రమశిక్షణ, పెంచాలి: నాగరాజు

మంచిర్యాల కాలేజీ రోడ్డులోని జూనియర్ కళాశాలలో ఫ్రెషర్స్ డే కార్యక్రమం జరిగింది. ఈ కార్యక్రమానికి ముఖ్య అతిథిగా బీజేపీ కార్పొరేటర్ కస్తూరి నాగరాజు హాజరయ్యారు. ఈ సందర్భంగా విద్యార్థులను ఉద్దేశించి ఆయన ప్రసంగించారు.

విద్యార్థులు క్రమశిక్షణతో చదువుకోవాలని, చెడు వ్యసనాలకు దూరంగా ఉండాలని కస్తూరి నాగరాజు సూచించారు. గురువులను, తల్లిదండ్రులను గౌరవిస్తూ, మంచి ప్రవర్తనతో విద్యలో రాణించే విద్యార్థులను ప్రోత్సహించాల్సిన అవసరం ఉందని తెలిపారు.

మంచి క్రమశిక్షణ, విద్యపై ఆసక్తి, తల్లిదండ్రులు మరియు గురువుల పట్ల గౌరవం చూపించే విద్యార్థుల్లో నుంచి ఐదుగురిని ఎంపిక చేసి, వారిని విమానంలో ఢిల్లీకి విజ్ఞాన యాత్రకు పంపిస్తానని కస్తూరి నాగరాజు విద్యార్థులకు ప్రకటించారు.

గతంలో కూడా ప్రభుత్వ పాఠశాలల విద్యార్థుల్లో ప్రతిభను ప్రోత్సహించేందుకు అనేక కార్యక్రమాలు నిర్వహించినట్లు ఆయన తెలిపారు. విద్యార్థులు ఈ అవకాశాలను సద్వినియోగం చేసుకుని ఉన్నత లక్ష్యాలను సాధించాలని ఆకాంక్షించారు.

ఈ కార్యక్రమంలో కళాశాల అధ్యాపకులు, సిబ్బంది, విద్యార్థులు పెద్ద సంఖ్యలో పాల్గొన్నారు.