అక్షరవేకువ: ముంబైలో బ్లడ్ బ్యాంకుల లైసెన్సులు సస్పెండ్ - రక్తదాతలకు బహుమతులు ఇచ్చినందుకు ఎఫ్డీఏ చర్య

స్వచ్ఛంద రక్తదానానికి బదులుగా బహుమతులు లేదా ఇతర ప్రలోభాలు ఇవ్వకూడదనే నిబంధనలను ఉల్లంఘించినట్లు విచారణలో గుర్తించడంతో ఈ నిర్ణయం తీసుకున్నారు. ఈ ఘటన ముంబైలో నిర్వహించిన రక్తదాన శిబిరానికి సంబంధించినది. ఇండియన్ రెడ్క్రాస్ సొసైటీ రక్తనిధి లైసెన్సును ఐదు రోజులపాటు, జేజే ఆసుపత్రి, నాయర్ ఆసుపత్రి రక్తనిధుల లైసెన్సులను మూడు రోజులపాటు నిలిపివేస్తూ అధికారులు ఆదేశాలు జారీ చేశారు.

తాత్కాలిక ఊరట

అయితే జేజే ఆసుపత్రి, నాయర్ ఆసుపత్రి రక్తనిధులు ఈ నిర్ణయాన్ని సవాలు చేస్తూ ప్రభుత్వానికి అప్పీలు చేసుకోవడంతో వాటికి తాత్కాలికంగా ఊరట లభించింది. 2020లో ముంబైలోని ఆల్టమౌంట్ రోడ్డులో యంగ్ స్టార్ కమిటీ ఆధ్వర్యంలో నిర్వహించిన రక్తదాన శిబిరానికి సంబంధించిన ప్రచార ప్రకటనల్లో రక్తదాతలకు టైటాన్ చేతి గడియారాలు బహుమతిగా ఇస్తామని పేర్కొన్నారు.

నిబంధనల ఉల్లంఘన

స్వచ్ఛంద రక్తదానంలో పాల్గొనే వారికి బహుమతులు ఇవ్వడం జాతీయ రక్త మార్పిడి మండలి మార్గదర్శకాలకు విరుద్ధం. ప్రారంభంలో నిర్వాహకులు, సంబంధిత రక్తనిధుల ప్రతినిధులు బహుమతుల పంపిణీ గురించి తమకు తెలియదని చెప్పినప్పటికీ, విచారణలో కొందరు రక్తదాతలను అధికారులు సంప్రదించగా, తమకు గడియారాలు అందినట్లు ధ్రువీకరించారు.

ఎఫ్డీఏ చర్యలు

దీంతో ఈ వ్యవహారంపై అధికారులు తదుపరి చర్యలు చేపట్టారు. ఎఫ్డీఏ అధికారులు మూడు రక్తనిధులను తనిఖీ చేసి, వివరణ కోరుతూ నోటీసులు జారీ చేశారు. సంబంధిత సంస్థల ప్రతినిధుల వాదనలు విన్న తర్వాత, వారు సమర్పించిన వివరణలు సంతృప్తికరంగా లేవని భావించిన అధికారులు, ఔషధాలు, సౌందర్య సాధనాల నిబంధనలు1945 ప్రకారం లైసెన్సుల సస్పెన్షన్కు ఆదేశాలు జారీ చేశారు.

స్వచ్ఛంద రక్తదానం అనేది సామాజిక బాధ్యతతో కూడిన సేవ అని మహారాష్ట్ర ఎఫ్డీఏ కమిషనర్ తుకారాం ముంఢే పేర్కొన్నారు. రక్తదానాన్ని ప్రోత్సహించేందుకు బహుమతులు లేదా ఇతర ప్రలోభాలను ఉపయోగించరాదని, సంబంధిత చట్టాలు, మార్గదర్శకాలను రక్తనిధులు తప్పనిసరిగా పాటించాలని స్పష్టం చేశారు. రక్తదానం ద్వారా ప్రాణాలను కాపాడవచ్చని, అయితే అది ఎలాంటి ప్రతిఫలాన్ని ఆశించకుండా స్వచ్ఛందంగా జరగాలని అధికారులు సూచించారు.