సంగారెడ్డి, 2026-08-21
సంగారెడ్డి జిల్లా పరిధిలోని 6 నుండి 9వ తరగతి విద్యార్థుల కోసం దీన్ దయాల్ స్పర్శ్ పథకం కింద స్కాలర్షిప్ కోసం దరఖాస్తులను ఆహ్వానిస్తున్నట్లు సంగారెడ్డి డివిజన్ పోస్టల్ ఎస్పీ డి.శ్రీహరి తెలిపారు. ఈ పథకం ద్వారా విద్యార్థులలో ఫిలాటలీ పట్ల ఆసక్తిని పెంపొందించడమే లక్ష్యంగా పెట్టుకున్నారు.
సంగారెడ్డి జిల్లా పరిధిలోని 6 నుండి 9వ తరగతి విద్యార్థుల కోసం 2026-27 విద్యా సంవత్సరానికి గాను దీన్ దయాల్ స్పర్శ్ పథకం కింద స్కాలర్షిప్ కోసం దరఖాస్తులను ఆహ్వానిస్తున్నట్లు సంగారెడ్డి డివిజన్ పోస్టల్ ఎస్పీ డి.శ్రీహరి తెలిపారు. శుక్రవారం సంగారెడ్డిలో ఆయన మాట్లాడుతూ, పిల్లలలో ఫిలాటలీ (స్టాంపుల సేకరణ) పట్ల ఆసక్తిని పెంపొందించడం, దీనిని ఒక హాబీగా ప్రోత్సహించడం ఈ పథకం ముఖ్య ఉద్దేశమని పేర్కొన్నారు.
ఈ పథకానికి 6వ తరగతి నుండి 9వ తరగతి వరకు చదువుతున్న విద్యార్థులు అర్హులు. ఎంపికైన ప్రతి విద్యార్థికి ఏడాదికి రూ. 6,000/- చొప్పున స్కాలర్షిప్ అందించబడుతుంది (త్రైమాసికానికి రూ. 1,500/- చొప్పున).
ఆసక్తి గల విద్యార్థులు తమ దరఖాస్తులను నిర్ణీత ఫార్మాట్లో 15.09.2026 లోపు సంగారెడ్డి డివిజన్ సూపరింటెండెంట్ ఆఫ్ పోస్ట్ ఆఫీసెస్ కార్యాలయానికి సమర్పించాలని ఎస్పీ సూచించారు. అర్హులైన విద్యార్థులందరూ ఈ అవకాశాన్ని సద్వినియోగం చేసుకోవాలని పోస్టల్ ఎస్పీ డి.శ్రీహరి కోరారు.
