సంగారెడ్డి, 2026-08-11
సంగారెడ్డి జిల్లాలోని జాతీయ రహదారి ఎన్ హెచ్-65పై మంగళవారం రాత్రి జరిగిన రెండు వేర్వేరు రోడ్డు ప్రమాదాల్లో మొత్తం 8 మంది మృతి చెందారు. ఈ ఘటనలపై పోలీసులు కేసు నమోదు చేసి దర్యాప్తు చేపట్టారు.
సంగారెడ్డి జిల్లాలోని జాతీయ రహదారి ఎన్ హెచ్-65పై మంగళవారం రాత్రి సుమారు 7:45 గంటలకు రెండు వేర్వేరు రోడ్డు ప్రమాదాలు చోటు చేసుకున్నాయి. ఈ దుర్ఘటనల్లో మొత్తం 8 మంది ప్రాణాలు కోల్పోయారు. చిరాగ్ పల్లి పోలీస్ స్టేషన్ పరిధిలోని సత్వార్ గ్రామ శివారులో యూ-టర్న్ తీసుకుంటున్న ఆటోను ఆయిల్ ట్యాంకర్ ఢీకొనడంతో ఈ ప్రమాదం జరిగింది. ఈ ఘటనలో ఆటోలో ప్రయాణిస్తున్న ఐదుగురు మహిళలు, ఒక ఆటో డ్రైవర్ సహా మొత్తం ఆరుగురు అక్కడికక్కడే మృతి చెందారు. ప్రమాదంలో గాయపడిన మహిళలను చికిత్స నిమిత్తం జహీరాబాద్ ప్రభుత్వ ఆసుపత్రికి తరలించారు.
అదే విధంగా కోహిర్ పోలీస్ స్టేషన్ పరిధిలోని కవెల్లి చౌరస్తా వద్ద జరిగిన మరో రోడ్డు ప్రమాదంలో ఇద్దరు వ్యక్తులు మృతి చెందగా, మరొకరికి గాయాలయ్యాయి.
ప్రమాదాల సమాచారం తెలుసుకున్న జిల్లా కలెక్టర్ ప్రతీక్ జైన్, ఎస్పీ పరితోష్ పంకజ్, అదనపు ఎస్పీ చైతన్య రెడ్డిలు వెంటనే ఘటన స్థలాలకు చేరుకుని పరిస్థితిని సమీక్షించారు. అనంతరం ఆసుపత్రులకు వెళ్లి క్షతగాత్రులను పరామర్శించి, వారికి మెరుగైన వైద్య సేవలు అందేలా సంబంధిత అధికారులకు సూచనలు చేశారు.
ఈ రెండు సంఘటనలపై కేసులు నమోదు చేసి దర్యాప్తు చేపట్టినట్లు, ప్రమాదాలకు గల కారణాలను తెలుసుకుంటున్నట్లు ఎస్పీ తెలిపారు.
