ఇందిరానగర్ గ్రామపంచాయతీ నూతన భవన నిర్మాణ పనులు మూడేళ్లుగా నిర్లక్ష్యంగా కొనసాగుతున్నాయని, ఈ జాప్యం వల్ల ప్రజలు ఇబ్బందులు పడుతున్నారని గ్రామ సర్పంచ్ అంబాల రాజు ఆరోపించారు. ఈ నేపథ్యంలో, కాంట్రాక్టర్ టెండర్ను రద్దు చేసి, కొత్త కాంట్రాక్టర్కు పనుల బాధ్యతలు అప్పగించాలని ఆయన ప్రభుత్వాన్ని, ఉన్నతాధికారులను డిమాండ్ చేశారు.
మాజీ హుస్నాబాద్ శాసనసభ్యులు వోడితల సతీష్ కుమార్ చొరవతో మూడు సంవత్సరాల క్రితం మంజూరైన గ్రామపంచాయతీ భవన నిర్మాణ పనులు, టెండర్ పొందిన కాంట్రాక్టర్ నిర్లక్ష్యం కారణంగా మధ్యలోనే ఆగిపోయాయని సర్పంచ్ తెలిపారు. దీనివల్ల గ్రామ ప్రజలకు అవసరమైన సేవలు అందించడంలో తీవ్ర ఇబ్బందులు నెలకొన్నాయని పేర్కొన్నారు.
ప్రస్తుతం కార్యాలయం నిర్వహించడానికి అద్దె భవనం కూడా అందుబాటులో లేకపోవడంతో, ప్రజాప్రతినిధులు, సిబ్బంది ఇబ్బందులు పడుతున్నారని సర్పంచ్ వివరించారు. భవన నిర్మాణంలో జాప్యంపై ఆయన తీవ్ర ఆవేదన వ్యక్తం చేశారు.
ఈ సమస్యపై అధికారులు తక్షణమే స్పందించి, ప్రస్తుత కాంట్రాక్టర్పై చర్యలు తీసుకోవాలని, టెండర్ను రద్దు చేసి, కొత్త కాంట్రాక్టర్కు నిర్మాణ బాధ్యతలు అప్పగించి, పనులను వేగవంతం చేయాలని సర్పంచ్ అంబాల రాజు విజ్ఞప్తి చేశారు. గ్రామ ప్రజల సమస్యలను పరిష్కరించాలని కోరారు.
