మూడు రాష్ట్రాల్లో బీజేపీ విజయం: అమీరిశెట్టి రాజ్ కుమార్ కీలక వ్యాఖ్యలు

ఈరోజు వెలువడిన ఐదు రాష్ట్రాల ఎన్నికల ఫలితాలలో భారతీయ జనతా పార్టీ మూడు రాష్ట్రాల్లో విజయం సాధించింది. ఈ నేపథ్యంలో, గర్మిళ్ల జోన్ అధ్యక్షులు అమీరిశెట్టి రాజ్ కుమార్ మాట్లాడుతూ, పశ్చిమబెంగాల్ ప్రజలకు నరహంతకులైన నాయకుల కబంధహస్తాల నుండి విముక్తి లభించిన రోజు ఇది అని అభివర్ణించారు.

బెంగాల్ రాష్ట్రంలో ఇంతటి విజయానికి తమ ప్రాణాలను సైతం పణంగా పెట్టి, చిత్రహింసలు అనుభవించిన భారతీయ జనతా పార్టీ కార్యకర్తలకు ఆయన అభినందనలు తెలిపారు. బీజేపీ వ్యవస్థాపకులు శ్యామ ప్రసాద్ ముఖర్జీ గారికి జన్మనిచ్చిన నేల అయిన బెంగాల్ రాష్ట్రంలో, మొట్టమొదటిసారిగా భారతీయ జనతా పార్టీ అత్యధిక మెజారిటీతో అధికారం దక్కించుకోవడం చారిత్రాత్మకమని ఆయన అన్నారు.

గత ప్రభుత్వాలు స్థానిక ప్రజల కంటే పొరుగు దేశమైన బంగ్లాదేశ్ ప్రజల పట్ల ప్రేమను కనబరుస్తూ, వారికి అనేక సౌకర్యాలు కల్పిస్తూ, తమ దేశ పౌరులను చిత్రహింసలకు గురిచేశాయని, ఈ గెలుపు ఆ అరాచకాలకు నిదర్శనమని ఆయన అభిప్రాయపడ్డారు. బెంగాల్ రాష్ట్రంలో బీజేపీ కార్యకర్తలు సంకల్ప బలంతో భారతీయ జనతా పార్టీని అధికారంలోకి తీసుకొచ్చారని తెలిపారు.

అంతకు మించిన ఉత్సాహంతో, సంకల్ప బలంతో రాబోయే ఎన్నికలలో తెలంగాణ రాష్ట్రంలో కూడా భారతీయ జనతా పార్టీ జెండా ఎగరవేస్తూ, కాంగ్రెస్‌ను భూస్థాపితం చేయడానికి తెలంగాణ బీజేపీ కార్యకర్తలు సిద్ధంగా ఉన్నారని ఆయన పేర్కొన్నారు. పశ్చిమబెంగాల్ రాష్ట్రంలో అనేక సంవత్సరాలుగా హిందూ సోదర సోదరీమణులు తమ ప్రాణాలను త్యాగం చేసి, అరాచక ప్రభుత్వాలకు అడ్డు నిలబడి పోరాడి, ఈరోజు భారతీయ జనతా పార్టీ జెండాను ఎగరవేశారని, ఈ విజయం వారి త్యాగాలకు అర్పితమని ఆయన అన్నారు.