బిసీ విద్యార్థుల ఫీజు రీయింబర్స్మెంట్ పథకాన్ని బలహీనపరిచే జీవో నంబర్ 7ను వ్యతిరేకిస్తూ బిసీ విద్యార్థి సంఘం ఆధ్వర్యంలో కరీంనగర్లో నిరసన తెలిపారు. తెలంగాణ చౌక్లో జీవో ప్రతులను దహనం చేసి, ప్రభుత్వంపై తీవ్ర విమర్శలు గుప్పించారు.
బిసీ విద్యార్థి సంఘం కరీంనగర్ జిల్లా అధ్యక్షుడు నారోజు రాకేష్ చారి మాట్లాడుతూ, రాష్ట్ర ప్రభుత్వం తీసుకువచ్చిన జీవో నంబర్ 7 బిసీ విద్యార్థుల ఫీజు రీయింబర్స్మెంట్ పథకాన్ని బలహీనపరిచే కుట్ర అని ఆరోపించారు. దీనికి నిరసనగా, సంఘం ఆధ్వర్యంలో బిసీ సంక్షేమ మరియు అనుబంధ సంఘాల నాయకులతో కలిసి తెలంగాణ చౌక్లో జీవో నంబర్ 7 ప్రతులను దహనం చేశారు.
రాకేష్ చారి మాట్లాడుతూ, రాష్ట్ర హైకోర్టు మధ్యంతర ఉత్తర్వుల ప్రకారం కాలేజీలు ఫీజులు వసూలు చేసుకోవచ్చని, అయితే ప్రభుత్వం గత నాలుగు సంవత్సరాలుగా ఫీజు రీయింబర్స్మెంట్ బకాయిలను విడుదల చేయడంలో నిర్లక్ష్యం వహించిందని పేర్కొన్నారు. జీవో నంబర్ 7 ద్వారా ప్రైవేట్ కాలేజీలు విద్యార్థుల నుంచి ఫీజులు వసూలు చేసుకోవచ్చని ప్రభుత్వం పరోక్షంగా తెలిపింది అని ఆయన విమర్శించారు.
ఈ జీవో బడుగు బలహీన వర్గాల విద్యార్థులను ఉన్నత విద్యకు దూరం చేస్తుందని, ఇది బిసీ విద్యార్థుల చదువుకు గొడ్డలి పెట్టులాంటిదని ఆయన అభివర్ణించారు. ఫీజు రీయింబర్స్మెంట్ పథకాన్ని యథావిధిగా కొనసాగించాలని, గత నాలుగు సంవత్సరాలుగా పెండింగ్లో ఉన్న సుమారు 7500 కోట్ల రూపాయల బకాయిలను వెంటనే విడుదల చేయాలని డిమాండ్ చేశారు.
ఈ నిరసన కార్యక్రమంలో బిసీ సంక్షేమ సంఘం జిల్లా అధ్యక్షుడు నాగుల కనకయ్య గౌడ్, రాష్ట్ర ప్రచార కార్యదర్శి జి.ఎస్. ఆనంద్, జిల్లా వర్కింగ్ ప్రెసిడెంట్ రాచమల్ల రాజు, జిల్లా ప్రధాన కార్యదర్శి దొగ్గలి శ్రీధర్, జిల్లా మహిళా అధ్యక్షురాలు దేవరకొండ సంతోషిని, మరియు ఇతర నాయకులు పాల్గొన్నారు.
