మంచిర్యాల జిల్లా కేంద్రంలోని హమాలివాడ ప్రాంతంలో అక్రమ మద్యం బెల్ట్ షాపులు విచ్చలవిడిగా వెలుస్తూ, స్థానికులకు తీవ్ర ఇబ్బందులు కలిగిస్తున్నాయి. పొద్దున, రాత్రి తేడా లేకుండా మద్యం సేవించడం వల్ల కుటుంబాలు రోడ్డున పడుతున్నాయని ప్రజలు ఆందోళన వ్యక్తం చేస్తున్నారు.
స్థానికుల కథనం ప్రకారం, హమాలివాడలో ఇళ్లలోనే మధ్యవర్తుల ద్వారా బెల్ట్ షాపులు నిర్వహిస్తున్నారని, ఇది సమాజానికి హానికరమని పేర్కొన్నారు. కొన్ని సందర్భాల్లో మహిళలే ఈ అక్రమ వ్యాపారంలో పాల్గొంటున్నారని, ఇది మరింత ఆందోళన కలిగించే అంశమని తెలిపారు.
ఈ బెల్ట్ షాపుల వల్ల అసాంఘిక కార్యకలాపాలు పెరిగిపోతున్నాయని, యువత మత్తుకు బానిసలవుతున్నారని స్థానికులు వాపోయారు. ఈ పరిస్థితిపై స్థానిక పోలీసులు, ఎక్సైజ్ శాఖ అధికారులు తక్షణమే స్పందించి, చట్టపరమైన చర్యలు తీసుకోవాలని కోరుతున్నారు.
అక్రమ మద్యం సరఫరాను అరికట్టి, బెల్ట్ షాపులను మూసివేయకపోతే, శాంతిభద్రతలకు విఘాతం కలుగుతుందని హెచ్చరించారు. జిల్లాలోని ఇతర ప్రాంతాల్లోనూ ఇలాంటి బెల్ట్ షాపులపై దృష్టి సారించి, వాటిని నిర్మూలించాలని ప్రజలు డిమాండ్ చేస్తున్నారు.
