పరిసరాలను పరిశుభ్రంగా ఉంచుకోవడం, నీరు నిల్వ ఉండకుండా చూడటం మలేరియా నివారణకు అత్యంత ముఖ్యమైనవని ఆరోగ్య అధ్యాపకులు అల్లాడి శ్రీనివాస్ అన్నారు. మందమర్రిలో జిల్లా వైద్య ఆరోగ్యశాఖ ఆధ్వర్యంలో నిర్వహించిన మలేరియా అవగాహన కార్యక్రమంలో ఆయన ఈ విషయాలు తెలిపారు.
ప్రభుత్వం జూన్ మాసాన్ని మలేరియా మాసంగా ప్రకటించిన నేపథ్యంలో, మందమర్రి ప్రాథమిక ఆరోగ్య కేంద్రంలో ప్రత్యేక అవగాహన కార్యక్రమం జరిగింది. ఆరోగ్య అధ్యాపకులు అల్లాడి శ్రీనివాస్ మాట్లాడుతూ, దోమల లార్వాలు నిలిచిన నీటిలోనే వృద్ధి చెందుతాయని, తద్వారా మలేరియా వ్యాప్తి చెందుతుందని వివరించారు.
ఎనాఫిలిస్ ఆడ దోమ కాటు ద్వారా మలేరియా ఒకరి నుండి మరొకరికి సంక్రమిస్తుందని, ఈ దోమలు శుభ్రమైన నీటి గుంతలలో గుడ్లు పెడతాయని ఆయన పేర్కొన్నారు. మలేరియా వ్యాప్తిని అరికట్టడానికి ప్రతి శుక్రవారం 'డ్రై డే' పాటించాలని, పూడ్చలేని గుంతలలో ఆయిల్ బాల్స్ వేయడం లేదా గంబూజియా చేపలను వదలడం వంటి చర్యలు తీసుకోవాలని సూచించారు.
దోమల పుట్టడాన్ని నివారించడం లేదా అవి కుట్టకుండా జాగ్రత్తలు తీసుకోవడం అత్యవసరమని, దోమతెరల వాడకం దోమ కాటు నుంచి రక్షణకు అత్యుత్తమ మార్గమని శ్రీనివాస్ తెలిపారు. ఈ సందర్భంగా మలేరియా మాసంపై అవగాహన కల్పించే కరపత్రాలను విడుదల చేసి, పంపిణీ చేశారు.
ఈ కార్యక్రమంలో మందమర్రి ప్రాథమిక ఆరోగ్య కేంద్రం వైద్యాధికారిణి డా. లక్ష్మీ ప్రసన్న, మిడ్ లెవెల్ హెల్త్ ప్రొవైడర్ డా. ప్రియ భవాని, సబ్ యూనిట్ అధికారి శ్రీనివాసరావు, ఆరోగ్య పర్యవేక్షకురాలు విజయ, ఏఎన్ఎం జ్యోతి, హెల్త్ అసిస్టెంట్లు మధు, శ్రీధర్, కుమారస్వామి, ఆశ కార్యకర్తలు పాల్గొన్నారు.
