అక్షరవేకువ: పెట్రోల్లో ఇథనాల్ మిశ్రమంపై కేంద్రానికి రాహుల్ గాంధీ ప్రశ్నలు.. చమురు సంస్థల ఖండన

లోక్సభలో ప్రతిపక్ష నేత, కాంగ్రెస్ అగ్రనేత రాహుల్ గాంధీ పెట్రోల్లో ఇథనాల్ కలిపే అంశంపై కేంద్రంలోని నరేంద్ర మోదీ ప్రభుత్వాన్ని ప్రశ్నించారు. పెట్రోల్లో 20 శాతం ఇథనాల్ ఉంటుందని కేంద్రం చెబుతున్నప్పటికీ, కర్ణాటక ప్రభుత్వం జిల్లాల్లో సేకరించిన నమూనాలను ప్రయోగశాలల్లో పరీక్షించగా, 14 నమూనాల్లో 11 నమూనాల్లో ఇథనాల్ శాతం 20 శాతానికి మించినట్లు తేలిందని రాహుల్ గాంధీ వెల్లడించారు. ఇండియన్ ఆయిల్ కార్పొరేషన్ పెట్రోల్ నమూనాలో 31.2 శాతం, హిందుస్థాన్ పెట్రోలియం నమూనాలో 30.5 శాతం ఇథనాల్ ఉన్నట్లు పరీక్షల్లో వెల్లడైందని ఆయన పేర్కొన్నారు. ఇండియన్ ఆయిల్, హెచ్పీసీఎల్, బీపీసీఎల్తో పాటు నయారా, షెల్ వంటి ప్రైవేటు సంస్థల పెట్రోల్లోనూ పరిమితికి మించి ఇథనాల్ ఉన్నట్లు ఆరోపించారు.

ఈ అంశంపై సామాజిక మాధ్యమం ఎక్స్లో స్పందించిన రాహుల్ గాంధీ, ఈ20 కాస్తా 420గా మారింది. ప్రజల వాహనాల నుంచి పెట్రోల్ దొంగతనం జరుగుతోంది అంటూ కేంద్ర ప్రభుత్వంపై విమర్శలు చేశారు. పెట్రోల్లో అధికంగా ఇథనాల్ కలపడం వల్ల వాహనాల మైలేజీ తగ్గుతుందని, నిర్వహణ ఖర్చులు పెరుగుతాయని, ఇంజిన్ పనితీరుపై ప్రభావం పడే అవకాశం ఉందని ఆయన ఆరోపించారు. పెట్రోల్ బంకుల్లో ఇంధనంలో ఎంత శాతం ఇథనాల్ ఉందో వినియోగదారులకు తెలియజేసే సమాచారం ఎందుకు అందుబాటులో లేదని ఆయన ప్రశ్నించారు. వాహనదారులు తమకు కావాల్సిన ఇంధనాన్ని ఎంచుకునే అవకాశం కూడా లేదని పేర్కొన్నారు.

దేశవ్యాప్తంగా సరఫరా చేస్తున్న పెట్రోల్లో వాస్తవంగా ఎంత శాతం ఇథనాల్ కలుపుతున్నారో ప్రధాని నరేంద్ర మోదీ స్పష్టం చేయాలని రాహుల్ డిమాండ్ చేశారు. నిర్దేశిత 20 శాతం పరిమితిని మించి ఇథనాల్ కలుపుతున్నట్లు ఆరోపణలు ఎదుర్కొంటున్న సంస్థలపై ఎప్పుడు చర్యలు తీసుకుంటారని ఆయన ప్రశ్నించారు. ప్రధాని మోదీతో బహిరంగ చర్చకు తాను సిద్ధంగా ఉన్నానని, ఈ అంశాన్ని కూడా చర్చలో చేర్చాలని ఆయన సవాల్ విసిరారు.

మరోవైపు, కర్ణాటక ప్రభుత్వం వెల్లడించిన పరీక్షా ఫలితాలను ప్రభుత్వ రంగ చమురు సంస్థలైన ఇండియన్ ఆయిల్ కార్పొరేషన్, భారత్ పెట్రోలియం, హిందుస్థాన్ పెట్రోలియం ఖండించాయి. పెట్రోల్ నమూనాల సేకరణ, పరీక్షల విధానం నిర్దేశిత నిబంధనలకు అనుగుణంగా జరగలేదని అవి అభ్యంతరం వ్యక్తం చేశాయి. తాము దేశవ్యాప్తంగా సరఫరా చేస్తున్న ఈ20 పెట్రోల్, బ్యూరో ఆఫ్ ఇండియన్ స్టాండర్డ్స్ నిర్దేశించిన ప్రమాణాలకు అనుగుణంగానే ఉందని అవి స్పష్టం చేశాయి. కర్ణాటక ప్రభుత్వం నిర్వహించిన పరీక్షలకు సంబంధించిన పూర్తి వివరాలు, ప్రయోగశాల నివేదికలు, నమూనాల సేకరణ విధానాన్ని తమకు అందించాలని అవి కోరాయి. ఈ అంశంపై స్వతంత్రంగా మరోసారి పరీక్షలు నిర్వహించేందుకు అవకాశం కల్పించాలని అవి విజ్ఞప్తి చేశాయి.

దీంతో పెట్రోల్లో ఇథనాల్ మిశ్రమ శాతంపై కేంద్రం, కర్ణాటక ప్రభుత్వం, చమురు సంస్థల మధ్య వివాదం కొనసాగుతోంది.