దేశ అభివృద్ధిలో, ముఖ్యంగా సాంకేతిక రంగంలో మాజీ ప్రధాని రాజీవ్ గాంధీ చేసిన సేవలను స్మరించుకుంటూ జిల్లా కాంగ్రెస్ పార్టీ నాయకులు ఆయనకు ఘనంగా నివాళులర్పించారు. జైపూర్ మండల కేంద్రంలో జరిగిన ఈ కార్యక్రమంలో, రాజీవ్ గాంధీని దేశంలో సాంకేతిక విప్లవానికి ఆద్యుడిగా అభివర్ణించారు.
జిల్లా కాంగ్రెస్ పార్టీ ఉపాధ్యక్షులు రిక్కుల శ్రీనివాస్ రెడ్డి, మండల కాంగ్రెస్ అధ్యక్షుడు విశ్వంబర్ రెడ్డి, పార్టీ జిల్లా ఉపాధ్యక్షులు గొనె నర్సయ్య లు మాట్లాడుతూ, రాజీవ్ గాంధీ దూరదృష్టితో దేశ అభివృద్ధికి బాటలు వేశారని తెలిపారు. భారతదేశంలో కంప్యూటర్, టెలికాం రంగాల్లో ఆయన ప్రవేశపెట్టిన సంస్కరణలే నేటి డిజిటల్ ఇండియాకు పునాది అని పేర్కొన్నారు.
రాజీవ్ గాంధీ వర్ధంతి సందర్భంగా, జైపూర్ మండల కేంద్రంలో కాంగ్రెస్ నాయకులు, సర్పంచ్లు కలిసి ఆయన చిత్రపటానికి పూలమాలలు వేసి నివాళులర్పించారు. ఈ సందర్భంగా, దేశాన్ని ఆధునిక టెక్నాలజీ వైపు నడిపించడంలో రాజీవ్ గాంధీ పాత్రను నాయకులు కొనియాడారు. 1980లలో కంప్యూటరీకరణపై వచ్చిన విమర్శలను పట్టించుకోకుండా, దేశ భవిష్యత్తును దృష్టిలో ఉంచుకొని ఆయన ముందుకు వెళ్లారని గుర్తుచేశారు.
నేటి యువత ఐటీ రంగంలో రాణిస్తున్నారంటే, భారతదేశం సాఫ్ట్వేర్ శక్తిగా ఎదిగిందంటే దానికి రాజీవ్ గాంధీ నిర్ణయాలే కారణమని నాయకులు పేర్కొన్నారు. టెలిఫోన్ సేవలను గ్రామీణ ప్రాంతాలకు విస్తరించడం ద్వారా కమ్యూనికేషన్ వ్యవస్థలో విప్లవాత్మక మార్పులు తెచ్చారని, సమాచార సాంకేతిక రంగాన్ని సామాన్యులకు అందుబాటులోకి తెచ్చారని అన్నారు.
అంతేకాకుండా, యువతకు రాజకీయాల్లో ప్రాధాన్యత కల్పించిన నాయకుడిగా కూడా రాజీవ్ గాంధీ గుర్తింపు పొందారని విశ్వంభర్ రెడ్డి తెలిపారు. దేశ యువశక్తిని అభివృద్ధి దిశగా నడిపించేందుకు విద్య, సాంకేతిక రంగాలకు ఆయన పెద్దపీట వేశారని అన్నారు. ఆయన ఆశయాలను కొనసాగిస్తూ ప్రజాసేవలో ముందుకు సాగుతామని కాంగ్రెస్ నాయకులు ప్రతిజ్ఞ చేశారు.
