మందమర్రి మండలంలోని ప్రైవేటు పాఠశాలలు విద్యా సంవత్సరం ప్రారంభం కావడంతో పాఠ్యపుస్తకాలు, యూనిఫామ్స్ వంటి వాటిని అధిక ధరలకు విక్రయిస్తూ విద్యార్థుల తల్లిదండ్రులను ఆర్థికంగా దోపిడీ చేస్తున్నాయని ఆరోపిస్తూ, ఐక్య విద్యార్థి సంఘాలు మండల విద్యాశాఖ అధికారికి ఫిర్యాదు చేశాయి.
ఐక్య విద్యార్థి సంఘాల నాయకులు మాట్లాడుతూ, మండలంలోని కార్పొరేట్, ప్రైవేటు పాఠశాలలు పాఠ్యపుస్తకాలు, యూనిఫామ్స్, షూలు, ఇతర స్టేషనరీ వస్తువులను మార్కెట్ ధరల కంటే ఎక్కువ ధరకు అమ్ముతూ విద్యార్థుల తల్లిదండ్రులను ఆర్థికంగా ఇబ్బందులకు గురి చేస్తున్నాయని తెలిపారు. చట్ట ప్రకారం పాఠ్యపుస్తకాలను పాఠశాల ఆవరణలో లేదా అనుబంధ దుకాణాలలో విక్రయించడం నేరమని, అయినప్పటికీ కొన్ని పాఠశాలలు నిబంధనలను పట్టించుకోవడం లేదని వారు పేర్కొన్నారు.
ప్రశ్నించిన తల్లిదండ్రులను, వారి పిల్లలను టీసీలు తీసుకుని వెళ్లాలని బెదిరిస్తున్నారని, ఇది విద్యార్థుల భవిష్యత్తుతో చెలగాటమాడటమేనని సంఘాల నాయకులు ఆరోపించారు. ఈ వ్యవహారంపై విద్యాశాఖ అధికారులు వెంటనే స్పందించి, చట్టవిరుద్ధంగా వ్యాపారం చేస్తున్న పాఠశాలలపై కఠిన చర్యలు తీసుకోవాలని వారు డిమాండ్ చేశారు.
ఈ ఫిర్యాదు కార్యక్రమంలో TVUV నుంచి చిప్పకుర్తి శ్రీనివాస్, TVS నుంచి రేగుంట క్రాంతి కుమార్, NSC నుంచి బచ్చలి అభిరామ్ పాల్గొన్నారు. ఈ సమస్యపై విద్యాశాఖ అధికారులు ఎలాంటి చర్యలు తీసుకుంటారనేది చూడాలి.
