కాంగ్రెస్ ప్రభుత్వ కరెంటు కుట్రలను నిరసిస్తూ బీఆర్ఎస్ పార్టీ ఆధ్వర్యంలో హైదరాబాద్లోని సింగరేణి హెడ్ ఆఫీస్ వద్ద గురువారం నిరసన కార్యక్రమం జరిగింది. మాజీ మంత్రి కొప్పుల ఈశ్వర్ నేతృత్వంలో బీఆర్ఎస్ బృందం కార్యాలయం ఎదుట ధర్నా చేపట్టింది.
బీఆర్ఎస్ పార్టీ ఇచ్చిన పిలుపు మేరకు, మాజీ మంత్రి కొప్పుల ఈశ్వర్, మాజీ మంత్రి జీవన్ రెడ్డి, ఎమ్మెల్యే కేపీ వివేకానంద, ఎమ్మెల్సీలు దాసోజు శ్రవణ్, శంభీపూర్ రాజు, మాజీ ఎమ్మెల్యే దివాకర్ రావు, టీజీబీకేఎస్ అధ్యక్షులు మిర్యాల రాజిరెడ్డి తదితర ముఖ్య నేతలు సింగరేణి హెడ్ ఆఫీస్ను సందర్శించారు.
సింగరేణి హెడ్ ఆఫీస్ వద్దకు చేరుకున్న బీఆర్ఎస్ నాయకులు, అధికారుల వైఖరికి నిరసనగా కార్యాలయం ఎదుట ధర్నాకు దిగారు. ఈ సందర్భంగా మాజీ మంత్రి కొప్పుల ఈశ్వర్ మాట్లాడుతూ, తెలంగాణ వ్యాప్తంగా తీవ్ర స్థాయిలో కరెంటు కోతలు విధించడంతో ప్రజలు ఇబ్బందులు పడుతున్నారని తెలిపారు.
పరిశ్రమలు, వ్యవసాయంపై ప్రభావం
పరిశ్రమలకు ఇప్పటికే పవర్ హాలిడే ప్రకటించారని, రాబోయే యాసంగి/వేసవి పంటలకు కూడా పూర్తి స్థాయిలో పవర్ హాలిడే ఇచ్చే యోచనలో రేవంత్ రెడ్డి ప్రభుత్వం ఉందని ఆరోపించారు. థర్మల్ విద్యుత్ ప్లాంట్లకు సింగరేణి సంస్థ సరిపడా బొగ్గు సరఫరా చేయకపోవడం వల్లే విద్యుత్ ఉత్పత్తి గణనీయంగా పడిపోయిందని అన్నారు.
ప్రభుత్వ వైఫల్యాలపై విమర్శలు
రాష్ట్ర ప్రభుత్వం సింగరేణి సంస్థకు దాదాపు 52,000 కోట్ల నుండి 60,000 కోట్ల వరకు బకాయిలు పడటమే ఈ పరిస్థితికి ప్రధాన కారణమని, బొగ్గు ఉత్పత్తి తగ్గిపోవడం రేవంత్ రెడ్డి ప్రభుత్వ ముమ్మాటికీ వైఫల్యమేనని విమర్శించారు. కేసీఆర్ పాలనలో 72 లక్షల మెట్రిక్ టన్నులుగా ఉన్న బొగ్గు ఉత్పత్తి, నేడు కేవలం 58 వేల టన్నులకు పడిపోయిందని, గతంలో లభించిన 24 గంటల ఉచిత విద్యుత్ పోయి, నేడు కనీసం 6 గంటలు కూడా కరెంటు రాని దౌర్భాగ్య పరిస్థితి దాపరించిందని పేర్కొన్నారు.
కాంగ్రెస్ ప్రభుత్వ వైఫల్యాలను, విద్యుత్ రంగంలో నెలకొన్న సంక్షోభాన్ని ప్రజలకు విడమరిచి చెప్పడానికే బీఆర్ఎస్ పార్టీ ఆధ్వర్యంలో పవర్ స్టేషన్లు మరియు సింగరేణి భవన్ల వద్ద ఈ నిరసన కార్యక్రమాలు చేపట్టినట్లు నేతలు స్పష్టం చేశారు. ఈ సందర్భంగా ఎంపీకి వినతి అందించి విద్యుత్ కోతలపై ప్రశ్నించగా అధికారులు సైతం సరైన సమాధానం చెప్పలేకపోతున్నారని ఆగ్రహం వ్యక్తం చేశారు.
