టాటా సన్స్ బోర్డులో తిరుగుబాటు: చంద్రశేఖరన్ పునర్నియామకం, లిస్టింగ్పై అక్షరవేకువ ప్రత్యేక కథనం

భారత పారిశ్రామిక రంగంలో అత్యంత ప్రతిష్ఠాత్మకమైన టాటా గ్రూప్లో అంతర్గత విభేదాలు మరోసారి బహిర్గతమయ్యాయి. టాటా సన్స్ బోర్డు ఇటీవల తీసుకున్న కీలక నిర్ణయాలు.. టాటా ట్రస్ట్స్ చైర్మన్ నోయెల్ టాటా, సంస్థ బోర్డు మధ్య భిన్నాభిప్రాయాలను స్పష్టంగా బయటపెట్టాయి. ఈ పరిణామాలను టాటా గ్రూప్పై భవిష్యత్తులో యాజమాన్య మార్పు లేదా బాహ్య ప్రభావం ఏర్పడే అవకాశాలతో ముడిపెడుతూ విశ్లేషణలు వెలువడుతున్నాయి.

బోర్డు సమావేశంలో ఏం జరిగింది

ఇటీవల జరిగిన టాటా సన్స్ బోర్డు సమావేశంలో ప్రస్తుత ఎగ్జిక్యూటివ్ చైర్మన్ ఎన్. చంద్రశేఖరన్ను మరో ఐదేళ్ల కాలానికి కొనసాగించాలని మెజారిటీ సభ్యులు నిర్ణయించారు. అయితే టాటా ట్రస్ట్స్ చైర్మన్ నోయెల్ టాటా ఈ నిర్ణయాన్ని వ్యతిరేకించారు. చంద్రశేఖరన్ తొలుత 2025లో తన పదవి నుంచి తప్పుకోవాలనే నిర్ణయం తీసుకున్నప్పటికీ, బోర్డు కోరడంతో ఆ నిర్ణయాన్ని పునఃపరిశీలించారు. అనంతరం బోర్డు మెజారిటీ ఓటుతో ఆయనను మరో ఐదేళ్లకు తిరిగి నియమించింది. నోయెల్ టాటా మాత్రమే ఈ పునర్నియామకానికి వ్యతిరేకంగా ఓటు వేశారు. చంద్రశేఖరన్ స్వయంగా ఓటింగ్లో పాల్గొనలేదు.