మంచిర్యాల జిల్లా కేంద్రంలో మంగళవారం నిర్వహించిన ప్రజాదర్బార్లో ప్రజలు తమ సమస్యలను నేరుగా ఎంపీ వంశీకి వివరించారు. దాదాపు 200 మంది హాజరైన ఈ కార్యక్రమంలో, సమస్యల సత్వర పరిష్కారానికి జిల్లా కలెక్టర్కు ఎంపీ ఆదేశాలు జారీ చేశారు.
ప్రభుత్వ ఆదేశాల మేరకు ప్రజా సమస్యల పరిష్కారానికి ఎంపీ నివాసంలో ప్రజాదర్బార్ ఏర్పాటు చేశారు. ఈ సందర్భంగా ఎంపీ వంశీ మాట్లాడుతూ, ప్రజల కష్టాలను తెలుసుకుని, వాటిని తీర్చడమే ప్రభుత్వ లక్ష్యమని తెలిపారు. రుణాలు, భూ సమస్యలు, ఇళ్ల కేటాయింపు, రేషన్ కార్డుల వంటి వివిధ అంశాలపై ప్రజలు తమ సమస్యలను చెప్పుకున్నారు.
సమస్యలను స్వీకరించిన ఎంపీ వంశీ, వెంటనే స్పందించి జిల్లా కలెక్టర్ కుమార్ దీపక్కు సూచనలు చేశారు. ప్రజలు సమర్పించిన ఆర్జీలను సత్వరమే పరిశీలించి, పరిష్కార మార్గాలను అన్వేషించాలని ఆదేశించారు. ప్రజాదర్బార్ అనేది ప్రభుత్వ పాలనలో ప్రజలకు మరింత చేరువయ్యేందుకు ఒక వేదిక అని ఆయన అభివర్ణించారు.
ఇందిరమ్మ ఇళ్లు, సన్న బియ్యం, రేషన్ కార్డుల పంపిణీ వంటి సంక్షేమ పథకాలను అర్హులైన ప్రతి లబ్ధిదారునికి అందేలా చూడటంలో అధికారులు అప్రమత్తంగా ఉండాలని ఎంపీ సూచించారు. ప్రభుత్వ పథకాల అమలులో పారదర్శకత పాటించాలని, ప్రజలకు ఎలాంటి ఇబ్బందులు కలగకుండా చూడాలని అధికారులను కోరారు.
ఈ ప్రజాదర్బార్ కార్యక్రమంలో జిల్లా కలెక్టర్ కుమార్ దీపక్, కాంగ్రెస్ డిసిసి జిల్లా అధ్యక్షులు రఘునాథరెడ్డి, ఇతర అధికారులు, ప్రజాప్రతినిధులు పాల్గొన్నారు. ప్రజల నుంచి అందిన వినతులను క్రోడీకరించి, తదుపరి చర్యల కోసం సంబంధిత శాఖలకు పంపనున్నట్లు అధికారులు తెలిపారు.
