సంగారెడ్డిలో వికాస్ ఒకేషనల్ జూనియర్ కళాశాల ప్రారంభం: మంత్రి దామోదర్ రాజనర్సింహ

తెలంగాణ రాష్ట్ర ప్రభుత్వం విద్యా, వైద్య రంగాల అభివృద్ధికి ఎంతో ప్రాధాన్యత ఇస్తోందని మంత్రి దామోదర్ రాజనర్సింహ అన్నారు. రాష్ట్రంలో విద్యార్థులకు స్కిల్ డెవలప్మెంట్ కోసం అవసరమైన శిక్షణ కార్యక్రమాలను నిర్వహిస్తున్నట్లు తెలిపారు. ఐటీఐలను ఆధునీకరిస్తున్నట్లు చెప్పారు. నర్సింగ్ విద్యార్థులకు వివిధ దేశాల్లో ఎన్నో అవకాశాలు ఉన్నాయని పేర్కొన్నారు. నర్సింగ్ విద్యార్థులకు జర్మనీ, జపనీస్ భాషలలో ప్రభుత్వం శిక్షణ ఇస్తోందని తెలిపారు. విద్యార్థులు సాంకేతిక పరిజ్ఞానం, వృత్తి నైపుణ్యం, భాషా ప్రావీణ్యతను పెంచుకొని తమ భవిష్యత్తును నిర్మించుకోవాలని మంత్రి దామోదర్ రాజనర్సింహ ఆకాంక్షించారు. ఆధునిక సౌకర్యాలతో ఒకేషనల్ కళాశాలను ఏర్పాటు చేసిన యాజమాన్యాన్ని మంత్రి అభినందించారు. ముఖ్యంగా, కళాశాల చైర్మన్ సూర్య కిరణ్, ప్రిన్సిపల్ లక్ష్మణ్ లను మంత్రి ప్రత్యేకంగా ప్రశంసించారు. ఈ కార్యక్రమంలో కళాశాల లెక్చరర్లు, విద్యార్థులు పెద్ద సంఖ్యలో పాల్గొన్నారు. ఈ నూతన కళాశాల ద్వారా అనేక మంది విద్యార్థులు వృత్తి నైపుణ్యాలను మెరుగుపరుచుకొని ఉపాధి అవకాశాలను అందిపుచ్చుకుంటారని ఆశిస్తున్నారు.