ఉత్తరప్రదేశ్లోని సంభాల్ జిల్లాలో మురుగునీటి కాలువ నిర్మాణం కోసం తవ్వకాలు జరుపుతుండగా సుమారు 150 ఏళ్ల నాటి వెండి నాణేలు బయటపడ్డాయి. గున్నౌర్ ప్రాంతంలోని జగన్నాథ్పూర్ గ్రామంలో ఈ ఘటన చోటుచేసుకుంది. మట్టి కుండలో భద్రపరిచిన ఈ నాణేలు 1875 నాటి విక్టోరియా రాణి పాలనాకాలానికి చెందినవిగా భావిస్తున్నారు.
ఉత్తరప్రదేశ్లోని సంభాల్ జిల్లాలో తవ్వకాలు చేపడుతుండగా సుమారు 150 ఏళ్ల నాటి వెండి నాణేలు బయటపడ్డాయి. గున్నౌర్ ప్రాంతంలోని జగన్నాథ్పూర్ గ్రామంలో ఒక ఇంటి వద్ద మురుగునీటి కాలువ నిర్మాణం కోసం తవ్వకాలు జరుపుతుండగా ఈ నాణేలు లభించాయి. మట్టి కుండలో వీటిని భద్రపరిచి ఉంచినట్లు గుర్తించారు.
గ్రామానికి చెందిన ఒక వ్యక్తి ఇంటి వద్ద ఇద్దరు కూలీలు తవ్వకాలు చేపట్టారు. ఈ క్రమంలో వారికి ఒక మట్టి కుండ కనిపించింది. అందులో వెండి నాణేలు ఉండటంతో వాటిని తీసుకెళ్లినట్లు సమాచారం. నాణేల పంపకం విషయంలో ఇద్దరు కూలీల మధ్య వివాదం తలెత్తడంతో ఈ విషయం వెలుగులోకి వచ్చింది. అనంతరం ఇంటి యజమాని పోలీసులకు ఫిర్యాదు చేశారు.
ఈ ఘటనపై విచారణ చేపట్టిన పోలీసులు ఇప్పటివరకు సుమారు 70 వెండి నాణేలను స్వాధీనం చేసుకున్నారు. ప్రాథమిక సమాచారం ప్రకారం ఈ నాణేలు 1875 నాటివిగా, విక్టోరియా రాణి పాలనాకాలానికి చెందినవిగా భావిస్తున్నారు.
నాణేల అసలు కాలం, వాటి చారిత్రక ప్రాధాన్యాన్ని నిర్ధారించేందుకు పురావస్తు శాఖకు సమాచారం అందించారు. ఈ నాణేలను పరిశీలించిన తర్వాత వాటి చరిత్రపై స్పష్టత వచ్చే అవకాశం ఉంది. ప్రస్తుతం పోలీసులు మిగిలిన నాణేల వివరాలను కూడా సేకరిస్తున్నారు.
