మందమర్రి ఏరియా శాంతిఖని గనిలో బహుళ విభాగాల సమీక్ష: ఉత్పత్తి లక్ష్యాల సాధనపై చర్చ

సింగరేణి సంస్థ వ్యాప్తంగా జరుగుతున్న బహుళ విభాగాల సమీక్షల్లో భాగంగా, మందమర్రి ఏరియాలోని చారిత్రాత్మక శాంతిఖని భూగర్భ గనిలో ఉద్యోగులతో బుధవారం ప్రత్యేక సమావేశం నిర్వహించారు. ఏరియా జనరల్ మేనేజర్ ఎన్. రాధాకృష్ణ మార్గదర్శకత్వంలో అధికారులు ఈ సమీక్షలో పాల్గొన్నారు.

శాంతిఖని గని చరిత్ర, ప్రాముఖ్యతను అధికారులు ఈ సందర్భంగా గుర్తు చేశారు. దశాబ్దాలుగా నాణ్యమైన బొగ్గు ఉత్పత్తితో సంస్థ అభివృద్ధికి దోహదపడుతోందని, ఎంతోమంది నైపుణ్యం కలిగిన ఉద్యోగులకు ఈ గని పుట్టినిల్లుగా నిలిచిందని ప్రశంసించారు. భద్రతా ప్రమాణాలను పాటిస్తూ, సంక్లిష్ట పరిస్థితుల్లోనూ బొగ్గు వెలికితీతలో ఉద్యోగుల శ్రమను కొనియాడారు.

సమావేశంలో కంపెనీ నిర్దేశించుకున్న ఉత్పత్తి, ఉత్పాదకత లక్ష్యాల సాధనపై సుదీర్ఘంగా చర్చించారు. భూగర్భ గనులలో అత్యాధునిక యంత్రాల వినియోగం, ఉత్పాదకత పెంపు, ఉద్యోగుల సంక్షేమ పథకాలు, ఆర్థిక అంశాలపై అధికారులు వివరణ ఇచ్చారు. కంపెనీ భవిష్యత్ కార్యాచరణ ప్రణాళికలు, ఎదుర్కోబోయే సవాళ్లను అధిగమించే మార్గాలపై కూడా చర్చించారు.

బొగ్గు నాణ్యతను మరింత మెరుగుపరచడానికి సమగ్ర నాణ్యతా నియంత్రణ చర్యలు చేపట్టాలని అధికారులు సూచించారు. బొగ్గు వెలికితీత సమయంలో రాయి, మట్టి కలవకుండా జాగ్రత్తలు తీసుకోవాలని, శాంతిఖని గని బొగ్గుకు మార్కెట్లో ఉన్న డిమాండ్‌ను నిలబెట్టుకోవాల్సిన బాధ్యత కార్మికులందరిపై ఉందని తెలిపారు. ఉద్యోగులు నిబద్ధతతో, క్రమశిక్షణతో విధులు నిర్వర్తించడం ద్వారా లక్ష్యాలను సులభంగా సాధించవచ్చని స్పష్టం చేశారు.