మంచిర్యాల జిల్లా కేంద్రంలో కాంగ్రెస్ ప్రభుత్వ విధానాలపై, ముఖ్యంగా రైతు సమస్యలపై బీఆర్ఎస్ నాయకులు తీవ్రస్థాయిలో విమర్శలు గుప్పించారు. నెల రోజులుగా ధాన్యం కుప్పలు కళ్ళల్లోనే ఉండటం, గన్ని సంచుల కొరత, అదనపు బరువు వేస్తూ రైతులను మోసం చేస్తున్నారని ఆరోపించారు.
బీఆర్ఎస్ సినీ ఫోటోగ్రఫీ చైర్మన్ పుష్కూరి రామ్మోహన్రావు మాట్లాడుతూ, "కాంగ్రెస్ ప్రభుత్వం రైతుల కష్టాలను పట్టించుకోవడం లేదు. గతంలో కేసీఆర్ పాలనలో రైతులు బాగుపడ్డారు. ఇప్పుడు వారిని మోసం చేస్తున్నారు" అని ఆరోపించారు. మంచిర్యాల అసెంబ్లీ నియోజకవర్గంలో సమస్యలు తీవ్రతరమయ్యాయని ఆయన పేర్కొన్నారు.
గన్ని సంచుల కొరతతో పాటు, 40 కేజీల సంచికి 4 కేజీల అదనపు బరువు వేసి రైతులను మోసం చేస్తున్నారని పుష్కూరి రామ్మోహన్రావు విమర్శించారు. ఈ రైతు మోసాలపై పోరాటం చేస్తామని, ప్రజల ఆకాంక్షలకు అనుగుణంగా పనిచేస్తామని ఆయన తెలిపారు.
ప్రజలు మళ్ళీ కేసీఆరే ముఖ్యమంత్రి కావాలని కోరుకుంటున్నారని, తాము ప్రజా కోరిక మేరకు పనిచేస్తామని ఆయన అన్నారు. రాబోయే రోజుల్లో బీఆర్ఎస్ పార్టీ తిరిగి అధికారంలోకి వస్తుందని ఆయన విశ్వాసం వ్యక్తం చేశారు.
ఈ కార్యక్రమంలో మాజీ మార్కెట్ కమిటీ చైర్మన్ పల్లె భూమేష్, స్త్రీ సంక్షేమ సంఘం జిల్లా మాజీ అధ్యక్షురాలు అత్తి సరోజ, మాజీ కౌన్సిలర్లు ఎడ్ల శంకర్, ఎండి తాజుద్దీన్, గంగులు, సీనియర్ నాయకులు తదితరులు పాల్గొన్నారు.
