అక్షరవేకువ: ముంబై కోస్టల్ రోడ్డుపై ఘోర ప్రమాదం.. 75 అడుగుల లోతులో బీఎండబ్ల్యూ కారు, ముగ్గురు యువకుల మృతి

పోలీసుల వివరాల ప్రకారం.. కారు మెరైన్ డ్రైవ్ నుంచి హాజీ అలీ వైపు వెళ్తుండగా తెల్లవారుజామున సుమారు 5.20 గంటల సమయంలో లోటస్ జెట్టీ సమీపంలో ప్రమాదం జరిగింది. మలుపు వద్ద కారు అదుపుతప్పి కోస్టల్ రోడ్డుపై ఉన్న గోడను ఢీకొని కింద ఉన్న నిర్మాణంలో ఉన్న పార్కింగ్ ప్రాంతంలో పడిపోయింది.

ఈ ప్రమాదంలో కారులో ఉన్న షనయ్ గుజ్జర్ (21), ఆదిత్య జకాసానియా (19), ధైర్య షేత్ (17) మృతి చెందారు. మరో యువకుడు ఆదిత్య ఓస్వాల్ తీవ్ర గాయాలతో ఆసుపత్రిలో చికిత్స పొందుతున్నాడు. నలుగురూ స్నేహితులని, ఉన్నత విద్య కోసం ముంబైలో ఉంటున్నారని పోలీసులు తెలిపారు.

అధిక వేగంతో ప్రయాణించిందా

ప్రాథమిక దర్యాప్తులో కారు గంటకు సుమారు 120 కిలోమీటర్ల వేగంతో ప్రయాణించి ఉండొచ్చని పోలీసులు అనుమానిస్తున్నారు. అయితే ప్రమాద సమయంలో కారు ఖచ్చితమైన వేగాన్ని దర్యాప్తు పూర్తయ్యే వరకు నిర్ధారించలేమని అధికారులు తెలిపారు. కోస్టల్ రోడ్డుపై ప్రధాన మార్గంలో వేగ పరిమితి గంటకు 80 కిలోమీటర్లు కాగా, మలుపులు, ర్యాంప్ల వద్ద మరింత తక్కువ వేగ పరిమితులు ఉన్నాయి.

మద్యం సేవించి వాహనం నడిపారా

ప్రమాదానికి ముందు యువకులు మద్యం సేవించారా అనే కోణంలోనూ పోలీసులు దర్యాప్తు చేస్తున్నారు. మృతుల రక్త నమూనాలను ఫోరెన్సిక్ పరీక్షలకు పంపినట్లు నివేదికలు వెల్లడించాయి. అలాగే వాహనంలో ఏదైనా సాంకేతిక లోపం ఉందా, లేక డ్రైవింగ్లో జరిగిన పొరపాటు కారణమా అనే విషయాలను కూడా పరిశీలిస్తున్నారు.

ప్రమాదం తీవ్రతకు కారు పూర్తిగా ధ్వంసమైన తీరు నిదర్శనంగా మారింది. ఈ ఘటనపై పోలీసులు కేసు నమోదు చేసి దర్యాప్తు కొనసాగిస్తున్నారు.