సంగారెడ్డి గ్రేడ్-1 మున్సిపల్ కార్యాలయంలో మహిళా ఉద్యోగులు వేధింపులకు గురవుతున్నారనే ఆరోపణలు కలకలం రేపుతున్నాయి. ఉన్నతాధికారి వేధింపులకు పాల్పడుతున్నారని బాధితులు మున్సిపల్ చైర్పర్సన్ కూన వనిత దృష్టికి తీసుకెళ్లారు.
సంగారెడ్డి కలెక్టరేట్లోని డీపీవో, హౌసింగ్ శాఖల్లో మహిళా ఉద్యోగులపై అధికారుల వేధింపుల ఘటనలు చర్చనీయాంశంగా మారిన నేపథ్యంలో, తాజాగా సంగారెడ్డి గ్రేడ్-1 మున్సిపల్ కార్యాలయంలోనూ మహిళా ఉద్యోగులు వేధింపులకు గురవుతున్నారనే ఆరోపణలు కలకలం రేపుతున్నాయి. మున్సిపల్ కార్యాలయంలో పనిచేస్తున్న కొందరు మహిళా ఉద్యోగులను ఒక ఉన్నతాధికారి వేధిస్తున్నట్లు ఆరోపణలు వినిపిస్తున్నాయి. ఇటీవల సెలవుపై వెళ్లిన ఒక అధికారితో సదరు మహిళా ఉద్యోగులు చనువుగా ఉంటున్నారనే అనుమానంతో, వారిని వ్యక్తిగతంగా లక్ష్యంగా చేసుకుని ఇబ్బందులకు గురి చేస్తున్నట్లు సమాచారం. ఈ వేధింపులు భరించలేక బాధిత మహిళా ఉద్యోగులు మున్సిపల్ చైర్పర్సన్ కూన వనితను కలిసి తమ సమస్యలను వివరించారు. దీనిపై స్పందించిన చైర్పర్సన్ కూన వనిత.. తాను కూడా ఒక మహిళనని, కార్యాలయంలో వేధింపులకు గురవుతున్న మహిళా ఉద్యోగులకు అండగా ఉంటానని భరోసా ఇచ్చారు. ఈ జిల్లా కలెక్టర్తో పాటు టీజీఐఐసీ మాజీ చైర్పర్సన్ నిర్మలా జగ్గారెడ్డి దృష్టికి తీసుకెళ్లి, సమస్య పరిష్కారానికి కృషి చేస్తానని బాధితులకు హామీ ఇచ్చినట్లు తెలిసింది. మహిళా ఉద్యోగులపై వేధింపుల ఆరోపణల నేపథ్యంలో సంబంధిత అధికారులు స్పందించి, సమగ్ర విచారణ జరిపి తగిన చర్యలు తీసుకోవాల్సిన అవసరం ఉందనే అభిప్రాయాలు వ్యక్తమవుతున్నాయి.
