భీమారం సమీపంలో, హైవేకి ఆనుకొని ఉన్న రహదారిపై కొందరు వ్యక్తులు నిత్యం చెత్త డంపింగ్ చేస్తుండటంతో స్థానికులు, వాహనదారులు తీవ్ర ఇబ్బందులు ఎదుర్కొంటున్నారు. పాఠశాలలకు వెళ్లే చిన్నారులు, మహిళలు ఈ మార్గంలో నడవాలంటేనే భయపడుతున్నారు.
హైవేకి ఆనుకొని ఉన్న ఈ రోడ్డు, పది గ్రామాలకు కీలక అనుసంధాన మార్గంగా ఉంది. అయితే, కొందరు బాధ్యతారహితంగా ఇక్కడ చెత్తను డంపింగ్ చేయడం వల్ల, తెల్లవారుజామున కుక్కలు ఆ వ్యర్థాలను రోడ్డుపైకి లాగి, దుర్వాసనతో పాటు అపరిశుభ్రతను పెంచుతున్నాయి. దీంతో ప్రజలు, ముఖ్యంగా విద్యార్థులు ఇబ్బందులు పడుతున్నారు.
గ్రామ పంచాయతీ అధికారులు 'చెత్త వేయరాదు' అని బోర్డు ఏర్పాటు చేసినప్పటికీ, కొందరు దానిని పట్టించుకోకుండా చెత్త వేయడం కొనసాగిస్తున్నారు. ఈ విషయంపై గ్రామ పంచాయతీకి పలుమార్లు ఫిర్యాదు చేసినా, ఇప్పటివరకు ఎలాంటి శాశ్వత పరిష్కారం లభించలేదని స్థానికులు వాపోతున్నారు. రోడ్డుపై వ్యర్థాలు పేరుకుపోవడం వల్ల ఆరోగ్య సమస్యలు తలెత్తుతాయని ఆందోళన వ్యక్తం చేస్తున్నారు.
ఈ సమస్యపై ఐటీడీఏ కాలనీవాసులు స్పందిస్తూ, 'ఇలాంటి సంఘటనలు పునరావృతం కాకుండా చూడాలని, గ్రామ పంచాయతీ అధికారులు తక్షణమే స్పందించి తగిన చర్యలు తీసుకోవాలని' కోరుతున్నారు. రోడ్డు రవాణాకు ఆటంకం కలిగిస్తూ, ప్రజల ఆరోగ్యంతో చెలగాటమాడుతున్న వారిపై కఠిన చర్యలు తీసుకోవాలని డిమాండ్ చేస్తున్నారు.
రోడ్డుపై పేరుకుపోయిన చెత్త వల్ల దుర్వాసనతో పాటు, కుక్కలు గుంపులుగా తిరుగుతుండటంతో ప్రజలు భయాందోళనకు గురవుతున్నారు. ఈ సమస్యపై అధికారులు దృష్టి సారించి, చెత్త డంపింగ్ను అరికట్టి, రహదారిని శుభ్రంగా ఉంచేలా చర్యలు తీసుకోవాలని స్థానికులు విజ్ఞప్తి చేస్తున్నారు.
