జైపూర్ గ్రామ పంచాయతీలో ఎంపీఓ శ్రీపతి బాపురావు ఆకస్మిక తనిఖీ

‘యాప్ ఇన్‌స్పెక్షన్’లో భాగంగా ఎంపీఓ శ్రీపతి బాపురావు జైపూర్ గ్రామ పంచాయతీ కార్యాలయానికి విచ్చేశారు. పంచాయతీ పరిధిలోని అభివృద్ధి పనుల పురోగతిని, నిర్వహణలో ఉన్న రికార్డులను ఆయన క్షుణ్ణంగా పరిశీలించారు.

పరిశుభ్రత, ప్లాస్టిక్ నియంత్రణపై ఎంపీఓ ప్రత్యేక దృష్టి సారించారు. గ్రామంలో పారిశుధ్య కార్యక్రమాలను మెరుగుపరచాలని, ప్లాస్టిక్ వాడకాన్ని తగ్గించాలని అధికారులను ఆదేశించారు. తడి, పొడి చెత్తను వేర్వేరుగా సేకరించి, కంపోస్టు ఎరువు తయారీకి వినియోగించాలని సూచించారు.

పనుల్లో పురోగతి సాధించేందుకు కూలీల సంఖ్యను పెంచాలని, వారికి అవసరమైన సౌకర్యాలైన టెంట్లు, తాగునీటిని అందుబాటులో ఉంచాలని సూచనలు చేశారు. ఇందిరమ్మ ఇండ్ల నిర్మాణ పనులు వేగవంతం కావాలని, నర్సరీ మొక్కల సంరక్షణ సక్రమంగా జరగాలని, పంచాయతీ రిజిస్టర్లను ఎప్పటికప్పుడు అప్‌డేట్ చేయాలని స్పష్టం చేశారు.

ఈ తనిఖీ కార్యక్రమంలో పంచాయతీ కార్యదర్శి బి. ఉదయ్ కుమార్, గ్రామ పంచాయతీ సిబ్బంది ఎంపీఓ వెంట ఉన్నారు. ఎంపీఓ సూచనలను అధికారులు అమలు చేస్తామని తెలిపారు.