మంచిర్యాల ఏసీసీ ప్రభుత్వ పాఠశాల పూర్వ విద్యార్థులు 34 బ్యాచ్లకు చెందిన సుమారు 800 మంది విద్యార్థులు, వారి ఉపాధ్యాయులు ఒక అరుదైన ఆత్మీయ మహాసమ్మేళనంలో పాల్గొన్నారు. చిన్ననాటి జ్ఞాపకాలను నెమరువేసుకుంటూ, మధురానుభూతులను పంచుకున్నారు.
1984 నుంచి 2019 విద్యా సంవత్సరాల మధ్య ఈ పాఠశాలలో చదువుకున్న పూర్వ విద్యార్థులు, వివిధ ప్రాంతాల నుంచి తరలివచ్చారు. ఉన్నత చదువులు, ఉద్యోగాలు, వ్యాపారాల నిమిత్తం వేర్వేరు చోట్లకు వెళ్లి స్థిరపడిన వారంతా ఒకేచోట చేరారు. పాఠశాల పరిసరాలను సందర్శిస్తూ, బాల్య స్మృతులలో మునిగిపోయారు.
సమ్మేళనంలో భాగంగా, పూర్వ విద్యార్థులు పాఠశాల నుంచి పటేల్ గార్డెన్ వరకు ర్యాలీ నిర్వహించారు. గార్డెన్ మొత్తం పూర్వ విద్యార్థులతో సందడిగా మారింది. ఈ సందర్భంగా విద్యార్థులు, ఉపాధ్యాయులు తమ అనుభవాలను, జ్ఞాపకాలను పంచుకున్నారు. ఇది పండుగ వాతావరణాన్ని తలపించింది.
పూర్వ విద్యార్థులు మాట్లాడుతూ, స్నేహితులు, ఉపాధ్యాయులతో కలవడం ఆనందంగా ఉందని, పాఠశాల నేర్పిన విద్యాబుద్ధులు, సంస్కృతి తమను ఉన్నతంగా తీర్చిదిద్దాయని తెలిపారు. ఈ సమ్మేళనం మరెన్నో మధుర జ్ఞాపకాలను మిగిల్చిందని పేర్కొన్నారు.
ఉపాధ్యాయులు తమ పూర్వ విద్యార్థులు ఉన్నత స్థితిలో ఉండటం చూసి సంతోషం వ్యక్తం చేశారు. విద్యార్థులు తమను ఆత్మీయంగా సత్కరించడం, చిన్ననాటి జ్ఞాపకాలను పంచుకోవడం వారికి ఎంతో ఆనందాన్నిచ్చింది. ఈ వేడుక అందరికీ చిరస్మరణీయంగా నిలిచింది.
